Aktuwal na itinuturo sa mga estudyante ng Ballesteros National High School (BNHS) na kasalukuyang sumasailalim sa work immersion ang iba’t ibang pamamaraan ng pagsasaka sa Cagayan Animal Breeding Center and Agri-eco Tourism Park sa Zitanga, Ballesteros, Cagayan.

Ayon sa pamunuan ng Provincial Veterinary Office (PVET) na nangangasiwa sa breeding center, pangunahing itinuturo sa mga estudyante ang poultry/livestock health and production management, vermi-culture production and management, forage production and management, at silage making.

Ang work immersion ng mga estudyante ng BNHS ay bahagi ng Senior High School Curriculum na programa ng Kagawaran ng Edukasyon kung saan sasailalim sila sa aktuwal na trabaho na nagsimula nitong ika-4 ng Marso 2024.

Unang sinabi ni Dr. Noli Buen, Provincial Veterinarian ng Pamahalaang Panlalawigan ng Cagayan na magtatagal ng isang buwan ang work immersion ng 29 estudyante na nasailalim ng Agri-Fishery Arts at Science, Technology, Engineering and Mathematics (STEM) ng BNHS. Unang pagkakataon rin aniya na may mag magsasagawa ng work immersion sa breeding center.

Ang Cagayan Animal Breeding Center and Agri-eco Tourism Park ay pinaganda ng Provincial Government of Cagayan (PGC) sa liderato ni Gov. Manuel N. Mamba.